هايدى دياب
ادارة المنتدى
عدد المساهمات : 246
العمر : 38
العمل/الترفيه : الكتابه والعزف
 |  موضوع: عايزة أستعد لرمضان ومش عارفة ؟ الجمعة يوليو 22, 2011 1:23 pm | |
| المعلومات كل سنه وانتم بخير رمضان على الأبواب أيام قليله
وتفتح أبواب الجنه وتقيد الشياطين ونشعر برحيق السعادة
لكن في حاجه غريبة اوي .. ليه فاضل وقت قليل على رمضان
وأنا مش عارفة أستعد حاسة اني معنديش حماس زي كل سنه
مش عارفة ليه ..؟
يمكن محبطة ..؟
يمكن ظروف البلد خنقاني ..؟
يمكن مبقتش أعرف أفرح وأستعد ..؟
أو يمكن مش عارفة أستعد إزاي ..؟
حوار طويل مع نفسي أسئلة كتير عماله تدور في بالي
إيه رأيكم تيجوا نفكر مع بعض
أكيد الحالة دي إتعرض ليها ناس كتير معايا
طيب متيجوا نبحث عن السبب الحقيقي وإزاي نعالجه
س / هل نشعر بـ إحباط ..؟
ج / جداً طبعاً وهو إيه في البلد بقى يفرح حد
ده يكفي مش عارفين نستمتع بالأجازة
س/ حاولت تغير من روتين يومك وتستغل طاقتك في حاجه مفيده ..؟
ج / إزاي وأنا كل ما أعمل حاجه حد يوقفني عنها ويقل من حماسي
س/ حاولت تمسك القرأن وتقراء جزء من القرأن هذه الأيام ..؟
ج / الحقيقه ياعني حاولت ولكن فشلت إني أختمه
س/ نفسك إيه يكون في رمضان السنادي غير أي سنه ..؟
ج / نفسي مضيعش ولا يوم ترويح في الجامع
وأحافظ على هدوء أعصابي وأكيد أتمنى أكون من عتقاء هذا الشهر
بعد الأسئله دي سرحت شويه وقلت
طيب ما اجرب ابدأء في أخر 10 أيام من شعبان اني أصلي قيام كتير
وبكده أستعد لصلاة الترويح لتعودي الدائم على الصلاة
وألتزم بصلاة الفجر كل يوم بشكل دائم وأحاول أخلص 10 أجزاء في كل يوم جزء
وبكده أتدرب على السحور بشكل يومي وأحافظ على السنه
وأجرب أروح أصلي الظهر بكرة في الحسين والعصر في السيدة نفيسه
وده هيخليني ألتزم بالذهاب الى الجامع
وأتفق أنا وأصحابي على مسابقه نعملها في رمضان لحفظ القرأن بهدايه
وده هيزيد حماسي
أحاول لما أتعامل مع أي شئ يغضبني أمسك أعصابي وأتصرف بحكمه
وده هيساعدني اني اتحكم في أعصابي ومفقدهاش في أي موقف
أمال فين المشكله ..........؟
المشكله إن محدش جاب لي فانوس ويمكن علشان كده محبطه
كل سنه وأنتم بخير و سعاده وأي حد لسه مستعداش لرمضان
او نسي ان رمضان خلاص على الأبواب
يلحق يستعد ده شهر واحد في السنه
ولا زم ميعديش علينا دون الإستفادة
ده فرصه جميله لينا كلنا .. وربنا يجعلنا من عتقاء الشهر الكريم
كل عام وأنتم بخير
فكرة وإعداد / هايدى دياب | |
|
